Benedictio infirmorum cum ligno Ssmæ Crucis DNJC, seu Signum Sancti Mauri Abbatis

Antea rite exponatur Reliquia veræ Crucis Dominicæ, duabus saltem candelis accensis. Excitetur deinde in infirmo actus contritionis et firma fiducia, ut adjutus meritis S.P. Benedicti et S. Mauri, ipsis intercedentibus, si Deo placeat, sanitatem obtineat. Recitentur tres Pater totidemque Ave, Maria et Gloria in honorem SS. Trinitatis: tum Sacerdos Ordinis sancti Benedicti indutus stola rubri coloris, manu dextera tenens elevatam Reliquiam sanctæ Crucis coram infirmo, dicit:

V. Benedíctio et cláritas et sapiéntia et gratiárum actio, honor, virtus et fortitúdo Deo nostro in sæcula sæculórum. R. Amen.

V. Pes meus stetit in dirécto. R. In ecclésiis benedícam te, Dómine.

Invocatio

Per sanctíssimum Nomen Dómini invocátum, optátam tibi donet sanitátem illa fides, qua sanctus Maurus per sequéntia verba ægrótos sanávit, et in qua ego, licet indígnus peccátor, eásdem preces super te humíliter prófero:

In nómine sanctíssimæ et inviduæ Trinitátis, adjútus méritis sanctíssimi Patris Benedícti, sta sanus (-a), o N., et incólumis super pedes tuos rectus (-a). In nómine Patris, et Filii, + et Spíritus Sancti. R. Amen.

Aña Vere languóres nostros ipse tulit, et dolóres nostros ipse portávit, cujus livóre sanáti sumus.

V. Qui propitiátur iniquitátibus hóminum. R. Ipse sanet infirmitátes tuas.

V. Dómine, exáudi oratiónem meam. R. Et clamor meus ad te véniat.

V. Dóminus vobíscum. R. Et cum spíritu tuo.

Oremus

Deus, ómnium cónditor creaturárum, qui ad restauratiónem humáni géneris únicum Fílium tuum, cooperante Spíritu Sancto, ex María Vírgine incarnári constituísti, et per sacrosánctum ac gloriósum vivíficæ Crucis lignum vulnéribus et languóribus animárum nostrárum, nos rediméndo, subveníre dignátus est: Ipse hunc fámulum tuum N. (hanc fámulam tuam N.) per vitális hujus signi virtútem ad prístinam redúcere dignéris sanitátem. Per eúndem Christum Dóminum nostrum. R. Amen.

Oremus

Dómine Jesu Christe, qui magístro meo beáto Benedícto dedísti potestátem apud Te impetráre, quod in nómine tuo péteret: Tu per ipsíus intercessiónem cunctos ab hoc fámulo tuo (hac fámula tua) languóres repéllere dignáre: ut, sanitáte percépta, gratiárum actiónem réferat nómini sancto tuo: Qui cum Patre et Spíritu Sancto vivis et regnas in sæcula sæculórum. R. Amen.

Signum

Per invocatiónem immaculátæ Dei Matris et Semper Vírginis Maríæ, et per intercessiónem sanctórum Benedícti et Mauri, Poténtia + Dei Patris, Sapiéntia + Dei Fílii, Virtus + Spíritus Sancti líberet te ab ista infirmitáte. Amen.

Sicut fúerit beneplácitum ejus, sic fiat: et fiat tibi, sicut petis et desíderas, ad laudem et honorem sanctíssimæ Crucis Domini nostri Jesu Christi

Ultimo benedicit infirmo Reliquia sanctæ Crucis, dicens:

Benedíctio Dei omnipoténtis, Patris, et Fílii, + et Spíritus Sancti descéndat super te et máneat semper. Amen.

Et porrigit Reliquiam ad osculum.

Hoc signum, si opus sit, repetitur per tres vices, sive diversis diebus, sive eadem die, juxta necessitatem. Tres etiam Missæ votivæ, si lubet, nempe de Passione, de S. Mauro Abbate et pro defunctis, celebrandæ erunt: alioquin beatissimæ Virginis Mariæ Rosarium in tres partes distributum juxta præfatam intentionem infirmus, si potest, recitabit, vel recitare faciet.